قصة ال47 رونين #47Ronin

Standard

ال 47 رونين

Sengakuji_47_ronin_graves

Graves of the Forty-seven Ronin at Sengaku-ji

أعتقد محبي افلام هوليود نسبة كبيرة منهم اكيد اتفرجوا على فيلم “47 Ronin” للممثل المشهور Keanu Reeves و اعتقد الغالبية عجبهم الفيلم لان قصته بتحكى عن نبل القيم البشرية اللى المفروض نلتزم بيها. أكيد منكم ناس تعرف ان الفيلم مبنى على قصة حقيقية طبعا باضافة بعض التفاصيل عشان الفيلم زى السحر و الكلام ده.

انا لما اتفرجت على الفيلم اتشديت انى اقرا القصة الحقيقية لانى بجد اتاثرت باللى حصل قدامى فى الفيلم و حبيت اتاكد معقول فيه بشر (ماعندهمش دين سماوى) عدهم الاخلاق دى كانوا عايشين معانا على نفس الارض؟ و الا ده كلام افلام؟ انا من فترة بدات ابنى نظرية مفادها ان الأخلاق مش محتاجة دين يحث عليها لان ربنا حاطط فى فطرتنا الخلاق الحميدة كلها اللى ما ينفعش نعيش من غيرها. بدليل ان فيه ناس كتير عندهم دين و ما تلاقيش فيه اخلاق خالص (اقصد بعندهم دين ان ليهم ديانة يعني مش متدينين).

لما قريت القصة الحقيقية اندهاشي اتضاعف حوالى تلات او اربع مرات زيادة عن اللى حصلي من الفيلم لانى اكتشفت ان القصة الحقيقية اكثر ابهارا

من الفيلم بكتير. مستعدين؟ اولا القصة الحقيقية مصدرها هو “Tales Of Old Japan” من تجميع A. B. Mitford عام 1871 و هو يعتبر اكثر المصادر ثقة بالرغم من تصاعد بعض الاسئلة عنها مؤخرا الا انها مازالت تعتبر مصدرا موثوقا منه لانه Mitford بنى أحداث القصة من مستندات و اوراق بقيت حتى هذا الزمن منذ احداث القصة الحقيقية. يلا نبتدى القصة؟

الأحداث بدأت بطقس يدعى  sankin kōtai و هو طقس يفرض على كل حاكم مقاطعة فى اليابان ان ينتقل الى منطقة Edo (الاسم القديم لطوكيو) ليعيش بها فترة بجانب الامبراطور او ال Shogun (الحاكم العسكري لليابان) قبل ان يعود الى مقاطعته و هكذا بالتبادل و فى هذا الطقس تعيش زوجة حاكم المقاطعة و ابنه (وريثه) كرهائن فى ايدو لضمان ولائه للامبراطور. فكان الدور على Asano Naganori حاكم مقاطعة Ako و Kamei حاكم مقاطعة Tsuwano و كانوا ينظمون مراسم الاحتفال باستقبال الامبراطور. 

كان المفروض ان كلاهما ياخد تعليمات المراسم من Kira Kozuke-no-Suke Yoshinaka و هو احد الظباط ذوو النفوذ فى Edo و كان معروف بغروره و غطرسته و ماكانش راضي عنهم بسبب انهم ما قدمولوش هدايا كويسة او رشوة بمعنى أصح. طبعا Asano كان ملتزم بالقواعد الاخلاقية فاتضايق من الموضوع ده و كذلك Kamei اللى بقى عنده استعداد يقتل Kira فى اقرب فرصة عشان هو اعتبر موضوع الرشوة ده اهانة ليهم لكن مستشارين Kamei كانوا مقدرين خطورة الموقف ان لو Kamei قتل Kira كان كل من يمت بصلة ل Kamei هيتعاقب فجمعوا رشوة كبيرة و ادوها بهدوء ل kira فى السر فبدأ يتعامل مع Kamei معاملة كويسة و ده هداه شوية لكن طبعا مازالت معاملة Kira مع Asano سيئة جدا لغاية ما وصل الموضوع ان Kira اهان Asano و وصفه بانه قاسي و ماعندوش أخلاق ساعتها Asano ما قردش يمسك نفسه خالص و غضب و هاجم Kira بخنجر و هما جوة قصر ال Shogun و جرحه فى وجهه لكن بعد كده الحراس فصلوهم عن بعض. 

عشان تكونوا عارفين، مجرد بس ان الواحد يطلع الخنجر او السيف بتاعه من غمده جوة سكن الامبراطور دى جريمة فى حد ذاتها مابالكم باللى حصل؟ لكن الامبراطور سمح ل Asano انه يموت نفسه بطريقة seppuku و دى بانه بيبقر بطنه بالسيف و دى عندهم طريقة موت خاصة بالساموراي فقط و هى أشرف طريقة ممكن يموت بيها بعد انه يموت فى المعركة. و الامبراطور عمل كده احتراما لتاريخ Asano عشان كده مارضيش يعدمه على انه مجرم.

طبعا الخبر ده لما وصل لقائد الساموراي التابع ل Asano و كان اسمه Oishi اتصرف و نقل عائلة Asano فى مكان بعيد لان طبعا كل مقاطعة Ako ما بقيتش تبع العيلة بسبب الجريمة دى بالاضافة ان كل الساموراى بقوا Ronin و ده لقب بيطلق على الساموراى اللى بيخذل سيده او سيده بينزع منه صلاحياته كلها و دى تعتبر عار للساموراى طول عمره. لكن طبعا من اخلاق الساموراى انه ما يسكتش على الظلم و خصوصا لو واقع على سيده او ال master بتاعه. فجمع نفسه هو و 46 واحد تانيين من جنود الساموراى و قسموا على نفسهم قسم سري بينهم انهم ينتقموا لسيدهم. و هنا اول مظهر من مظاهر الاعجاب. الامبراطور كان منع ان حد ياخد بتار Asano عشان ما تحصلش مشاكل فمعنى كده ان ال47 دول لو فشلوا Kira هيقتلهم كلهم لو حاولوا يهجموا عليه و لو نجحوا الامبراطور هيقتلهم كمجرمين بسبب مخالفتهم لامره. يعني كده كده ميتين و مع ذلك قرروا يكملوا انتقاما لشرف سيدهم.

قعدوا يخططوا عرفوا ان لو هاجموا دلوقتى هيفشلوا بسبب ان Kira اكيد كان متوقع انهم ينتقموا و بالتالى كان مستعد كويس جدا و كمان كان معين جواسيس عليهم كلهم و خصوصا Oishi يراقبوهم و ينقلوله تحركاتهم. فعشان كده ال47 رونين فرقوا نفسهم و اشتغلوا تجار و رهبان عشان يبعدوا الشكوك و Oishi نفسه سكن فى Kyoto و بدا يتردد على الحانات و بيوت الدعارة عشان الجواسيس يحسوا انه ماعادش فى دماغه اى حاجة من الانتقام. لدرجة انه تمادى فى الموضوع و خلى نفسه يوصل لدرجة من السكر لدرجة انه اغمى عليه و هو مروح و نام فى الطريق و الناس فضلت تضحك عليهز و واحد من اللى معديين عليه وصل بيه الموضوع انه بصق عليه و ركله برجله احتقارا ليه انه تخلى عن ثأر سيده.

و هنا تانى نقطة تدعو للاعجاب و هى التخطيط الدقيق جدا بحيث ما يسيبوش اى ثغرة خالص تشكك جواسيس Kira فيهم. و تالت نقطة ان Oishi راح طلق مراته و نقلها هى و عياله بعيد عشان لو مهمتهم فشلت ما يطولهمش انتقام Kira و ما فضلش منهم غير ابنه الكبير Chikara هو اللى اصر يكمل المعركة مع والده. دى تدل على مدى الاخلاص و التفانى فيهم كلهم لان موضوع ان زوج و زوجة بيحبوا بعض لاكتر من 20 سنة انهم يتطلقوا لكن زوجته انصاعت لطلبه. بعد كده Oishi طلب من بقية ال47 انهم يعملوا نفس الحركة مع زوجاتهم و فعلا كلهم عملوا كده. 

طبعا كل ده أقنع Kira انهم ساموراى فشلة و جبناء مش هينتقموا لسيدهم و بالتالى تخلى عن جزء كبير من حرسه و جواسيسه عشان يوفر فى التكاليف. و على الجانب الاخر كان عمل ال 47 رونين كتجار و عمال مكنهم انهم يعرفوا تفاصيل قصر Kira من جوة و الناس اللى جوة و عدد الحراس و التفاصيل دى كلها لدرجة ان الموضوع وصل بواحد منهم اسمه Kinemon Kanehide Okano انه اتجوز ابنة مصمم القصر عشان يعرف يوصل للورق اللى فيه التصاميم الداخلية للقصر. و الباقيين كانوا بيجمعوا الاسلحة و المعدات اللازمة للمعركة المرتقبة. 

و بعد سنتين تقريبا كان الوضع مستعد للمعركة تماما كان Kira تخلى عن جزء كبير من حرسه و ال47 رونين كانوا مستعدين بالخططة و التفاصيل و المعلومات و السلاح.  ال47 رونين اتجمعوا فى مكان سري فى Edo عشان يجددوا قسمهم. يوم 30 يناير 1703 كان اليوم المقرر للهجوم و قبل ما يتم الهجوم Oishi اتخذ قرار رائع جدا.

بعت رسل لكل البيوت المجاورة لمنطقة القصر عشان يعرفهم انهم مش لصوص لكنهم جايين ياخدوا بتار السيد بتاعهم و واحد منهم طلع على سطح عالى و نشر الخبر باعلى صوته عشان ماحدش من الابرياء اللى فى البيوت دى ينضر فى المعركة. و دى تدعو للاعجاب مع ان قوانين الساموراى مش بتمنعهم من قتل الابرياء فى المعركة لكن ده خلق لا يحتاج لكود او دين معين ينص عليه. و طبعا الجيران عشان كارهين Kira وعارفين ان الحق مع ال47 رونين فمااعترضوش طريقهم.

تم الهجوم من البوابة الخلفية و الامامية فى نفس الوقت بالسيوف و السهام باشارة من دقة طبلة و كان هناك اتفاق على ان اللى يقتل Kira يبعت اشارة صفارة عشان يعرف الباقيين. و تم وضع مجموعة من رماة السهام على سطح القصر عشان لو حد من الجنود حاول يهرب يجيب نجدة من برة القصر يصطادوه. و ملخص المعركة ان ال47 رونين قتلوا 16 من الجنود و جرحوا 22 من بينهم حفيد Kira و قعدوا فترة يبحثوا عن Kira لغاية ما لقوه مستخبي فى دولاب مع زوجته و جارياته. 

800px-HokusaiChushingura

The ronin attack the principal gate of Kira’s mansion

ساعتها اطلقوا الصفارة الاشارة المتفق عليها و قتلوا و قطعوا راسه و علقوها على خنجر لكن قبلها Oishi عرض عليه انه يقتل نفسه على انه ساموراى لكن Kira كان بيرتعش و خايف و مش بينطق. و قبل ما يغادروا القصر ال47 رونين طفوا كل المصابيح و اى مصادر للنار فى القصر عشان ما يحصلش حادثة و النار تمسك فى حاجة و تضر البيوت المحيطة. واحد منهم Terasaka Kichiemon سابهم و راح Ako عشان يبلغ خبر نجاح انتقامهم. 

بعدها اخدوا راس Kira و حطوها على قبر Asano عشان يرقد فى سلام مع ورقة فيها اسمائهم و الخنجر اللى قطعوا بيه راسه و دفعوا كل الفلوس اللى معاهم للرئيس الدير اللى فيه القبر و طلبوا منه يدفن الحاجات دى بطريقة محترمة و طلبوا منه يصلي و يدعيلهم. 

بعد كده مشيوا مسافة 10 كيلومتر عشان يوصلوا لقصر الامبراطور و يسلموا نفسهم (مع انهم كان ممكن يهربوا و ماحدش هيسلمهم لان المواطنين كانوا متضامنين معاهم) و الناس على طول الطريق كانوا بيستقبلوهم و يعرضوا عليهم مشروبات و يحيوهم على اللى عملوه. لما وصلوا و سلموا نفسهم كان الامبراطور بين نارين يا اما يعدمهم على انهم مجرمين عشان خالفوا اوامره او انه ما يعاقبهمش فهو اختار حل وسط و رجعلهم رتبتهم على انهم ساموراى و سمحلهم يقتلوا نفسهم بال Seppuku و يموتوا موتة فيها شرف و منهم Chikara ابن Oishi اللى كان عنده ساعتها 16 سنة بس. اما عن Terasaka اللى كان راح Ako يبلغ خبر انتصارهم لما رجع يسلم نفسه ساعتها الامبراطور عفا عنه و فضل عايش لغاية ما مات و هو عنده 87 سنة و اتدفن مع بقية زمايله. 

اهم نتيجة للى عملوه ده ان سمعة Asano و تركته رجعت تانى و مقاطعة Ako رجعت تانى زى ما كانت للعيلة و حكمها Asano Daigaku Nagahiro اخو Asano الصغير و كل جنود Asano اللى كانوا مش لاقيين شغل بعد ما مات رجعوا يشتغلوا تانى. 

و حاليا مقابر ال47 رونين عبارة عن مزار سياحي و فى يوم 14 ديسمبر من كل عام معبد Sengakuji اللى فيه المقابر بيعمل مهرجان احتفالى للاحتفال بالحدث ده. 

القصة دى مثال للاخلاق و العزة و الشرف و بتأكد وجهة نظري ان “الأخلاق مش محتاجة دين ينص عليها” ربنا خلق فى فطرتنا الاخلاق كلها اللى ما ينفعش نعيش من غيرها. الدين وظيفته انه بيفكرنا بيها مش اكتر. 

انا لو قدرلى فى يوم من الايام انى اسافر اليابان لازم طبعا هزور المقابر بتاعتهم احتراما للى عملوه و اخلاقهم. 

المصدر: http://en.wikipedia.org/wiki/Forty-seven_Ronin

The Mayan Calendar – Part 1

Standard

بسم الله الرحمن الرحيم

The Mayan Calendar

Mayan-Calendar-Stone

حضارة المايا

حضارة المايا لمن لا يعرفها هى حضارة رائعة لا تقل تقدما و لا غموضا عن الحضارة الفرعونية كانت موجودة فى منطقة عرفت باسم Mesoamerica او امريكا الوسطى و هى منطقة بين المكسيك و أمريكا الجنوبية و المنطقة دى كانت بتضم حضارات تانية كتير زى الأزتك Aztecs

المكان اللى حضارة المايا كانت موجودة فيه هو دلوقتى دولة جواتيمالا Guatemala و بيليز Belize و هندوراس Honduras و السلفادور El Salvador و المكسيك الجنوبية Southern Mexico

حضارة المايا لو فضلنا نتكلم عنهم من هنا للسنة الجاية مش هنخلص

لانهم ما يقلوش عن الفراعنة حاجة فى التقدم فى مجالات زى الفلك و الرياضة و العمارة و الفنون

و باذن الله نبقى نعمل موضوع ليهم لوحدهم نتكلم عنهم بالتفصيل

اللى يهمنا من حضارة المايا كلها فى الموضوع ده حاجة واحدة بس

أثر واحد بس من آثارهم الكتير جدا

قطعة حجر واحدة بس

Continue reading