About

Page

اعتقد كلنا متاكدين ان العلم بجانب الدين حاجتين ضروريتين جدا لعمل نهضة حضارية و تكون الدولة ليها هيبة على المستوى الدولى. من صغري و انا بعشق العلم و كنت كل يوم بيزداد كرهي للعرب لانى شايفهم حاطين العلم فى ادنى مراتب الاهمية بالنسبة لهم اللهم الا فئة قليلة بتطلع كل كام سنة تفرحنا بانجاز و بعد كده ما فيش زى أحمد زويل فخر مصر كلها و مجدى يعقوب و فاروق الباز و امثالهم من المصريين و العرب اللى بيرفعوا راسنا كل عدة سنين بانجاز

لكن ارجع و اقول ان كل الانجازات دى صحيح اللى عملها مصريين بس عملوها برة مصر … سافروا برة اتعلموا و اتمولوا كويس و اتوفرتلهم احدث الامكانيات عشان يطلعوا مواهبهم العقلية و عبقريتهم. و من غير الحاجات دى ماكانش زماننا سمعنا عن اى حد منهم.

ليه الوطن العربي محتقر العلم للدرجة دى؟ ما اعتقدش ان الاجابة “ما فيش فلوس” مقنعة لان الوطن العربي و مصر فيهم فلوس كتير جدا بس بتتصرف على اتفه الحاجات حتى بعد ما عملنا ثورة و فرحنا بيها برضه العادات هى العادات ما اتغيرتش

ليه الفضول العلمى عندنا مات؟
ليه مش بنقرا؟
ليه مش بنتفرج على قنوات علمية؟
ليه ما نالفش احنا كتب فى العلوم بدل ما بنكتفي بترجمتها؟

عشان كل الاسباب دى قررت انى اعمل المدونة دى
المدونة دى هدفي منها انى ابسط كل اوجه العلوم اللى قريت عنها و عرفتها للناس اللى مش متخصصة
عارفين ليه؟
لان العيل الصغير فى امريكا و اوروبا و اليابان اللى ماكملش 14 و 15 سنة عارف الحاجات دى
يبقى دى مالهاش تخصص
مش عشان انت مجالك ادبي مثلا يبقى ما يبقاش عندك “المعلومات العامة” اللى كل الناس المفروض انها عارفاها

انا مش هدخل فى تفاصيل و لا معادلات رياضية (الا للى يطلبها) لكن انا هبسط الموضوع قدر الامكان بابسط الامثلة
و حتى هتكلم بالعامية العادية عشان توصل للناس بسرعة
هتكلم فى مجالات مختلفة و هقول رايي في كل حاجة
و هو ده الفرق اللى عاوزه اننا ما ناخدش اى كلام نشوفه كمسلم بيه
لا لازم نفكر بعقلنا الاول
فيه ناس لغاية الوقتى لسه بتدرس فى نظريات بتناقض نظريات اينشتين اللى اتبنى عليها علم الفيزيا الحديث كله
لانهم عندهم وجهة نظر مختلفة و مصرين عليها برغم اعتراض اللى حواليهم

دى هتكون بداية المدونة
هبدا كل اسبوع انزل موضوع او اتنين (نظرا لانشغالى بالدراسة) و اشوف ردود الفعل
و باذن الله فى الاجازة بعد كده هكتر المعدل

ارجو ان الموضوع ينال اهتمامكم و يكون مفيد فعلا للناس
ارجو ان المدونة ما تكونش بالنسبة لكم مصدر لموضوعات كويسة تنقلوها فى منتديات تانية عشان تاخدوا شهرة و خلاص زى ما بيحصل على طول 😀

ارجو ان بعد 10 او 20 سنة من المبادرة دى الاقي اى مجموعة شباب قاعدين مع بعض فى قعدة و حد فيهم ذكر كلمة زى “ثقب اسود” او “النسبية الخاصة” او حاجة فى عالم الحيوان او الفراعنة او الحضارات القديمة او الميتافيزيقا الباقيين يعرفوا يفهموه و يتناقشوا معاه مهما كانت تخصصاتهم مختلفة

دى مقدمة بسيطة بس توضح الهدف من المدونة و ليه انا عملتها

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s