القول الفصل فى أهمية الروايات

Standard

القول الفصل فى أهمية الروايات

For English Version

فى الفترة الاخيرة اشتركت فى جروب على الفيس بوك للقراءة

و فى أحد الايام لقيت احد الاعضاء حاطط سؤال على الجروب “ما هى أهمية الروايات؟ و هل تستحق ثمنها الذي يكون فى بعض الاحيان باهظا؟”

و الغريب اني لقيت ردود كتير جدا من ناس المفروض انهم بيحبوا القراءة و مدمنين كتب بيقولوله ان الروايات ماهي الا مضيعة للوقت و مافيهاش اي فايدة

انا استغربت جدا و قررت اعمل الموضوع ده عشان اوضح اهمية الروايات كنوع من انواع القراءة

اولا الفايدة من قراءة الرواية تنقسم لحاجات كتير اوى هحاول اشرحها بشكل مبسط فى النقط التالية:

1- الروايات تعطى معرفة غير مباشرة

و دى اهم فايدة فى وجهة نظري ان الرواية بيكون فيها معلومات كتير جدا فى مجالات مختلفة بتقراها و انت بتقرا الرواية غصب عنك حتى لو انت مش عاوز. و هذكر كام مثال عشان الناس تبقى عارفة انا اقصد ايه. 

مدمني روايات نبيل فاروق مثل رجل المستحيل و ملف المستقبل اكيد عارفين و ليهم تاريخ طويل مع الهامش اللى فى اخر الصفحة 😀 

لما بيكون فيه مصطلح علمى او اقتصادى او سياسي او تاريخي او حقيقة فى اى مجال من المجالات بيتم شرحه بمزيد من التفصيل فى هامش تحت فى اخر الصفحة. انا فاكر انى انا و صديق ليا و احنا فى ابتدائي اتفقنا كل واحد يجيب اجندة و اى معلومة يلاقيها فى الهوامش و احنا بنقرا نكتبها فى الاجندة و كل واحد ماسك سلسلة مختلفة. انا فاكر ان بعد حوالى 50 عدد الاجندتين اتملوا على اخرهم معلومات متنوعة فى مختلف المجالات يمتلكها و يعرفها طفلين فى المرحلة الابتدائية. 

تانى مثال هقوله لو واحد مثلا مش بيحب يقرا فى السياسة (مثلي) على سبيل المثال هيجيب معلومات سياسية منين؟ 

مالوش بقى غير التلفزيون و النت بس هو لو مش بيحب يقرا فى السياسة يبقى اكيد برضه مش بيحب يتفرج عليها 

طب لو فرضا هو بيقرا رواية معينة و اتقال فيها معلومة او معلومات سياسية بتخدم قصة الرواية فاكيد الشخص ده هيقراها شاء ام لا … مش كده؟ 

و بكده يبقى انت و انت بتستمتع بالرواية اتعلمت معلومات جديدة فى مجال انت مش بتقرا فيه اصلا و بالتالى لولا الرواية دى عمرك ما كنت هتعرف المعلومة دى. 

2- الروايات شرارة الابداع و الاستكشاف 

اولا الروايات بتنمى خيال القارئ و المؤلف اكتر و اكتر كل ما تعمق فيها و طبعا معروف ان الخيال من اهم اعمدة الابداع و الابتكار العلمى. 

و عشان ما اكونش بقول كلام فى الهواء هقول بعض الامثلة:

مخترع شبكة الانترنت WWW World Wide Web و هو Tim Berners Lee بيقول ان فكرة اختراع شبكة الانترنت و هى عبارة عن شبكة بتربط اجهزة كمبيوتر ببعضها جت من قصة قصيرة قراها فى طفولته اسمها Dial F for Frankenstein للمؤلف Arthur C. Clarke لان القصة كان فيها شبكة من التليفونات بتتواصل مع بعضها للسيطرة على العالم. 

Robert H. Goddard مخترع اول صاروخ يعمل بالوقود السائل كان قد كرس حياته لهذا الاختراع بعد ما قرأ رواية The War of The Worlds للمؤلف الشهير الأب الروحي للخيال العلمي H. G. Wells و الصاروخ ده ادى فى النهاية الى مشروع Apollo و وصول الانسان الى القمر. 

رواية The World Set Free لنفس المؤلف تنبا فيها باختراع قنبلة تعتمد على تفاعل نووى و لها طاقة مدمرة قد يصل تأثيرها لايام متواصلة. و قد قرا الفيزيائي Leo Szilard الرواية عام 1932 فتوصل فى العام التالى الى نظرية Nuclear Chain Reaction مما ادى الى مشروع مانهاتن لانتاج القنبلة الذرية بعدها ب8 اعوام. 

رواية Frankenstein و التى تم تاليفها عام 1817 للمؤلفة Mary Shelley هى التى اعطت اشارة البدء لانطلاق علم synthetic biology و Artificial Life حتى ان العلماء عندما ينتجون نظام حياة صناعى يطلقون عليها Frankenstein Moment

و طبعا ما نقدرش نتجاهل المؤلف العبقري Jules Verne و روايته 20,000 Leagues Under The Sea و اللى ساهم بيها بشكل كبير جدا فى فكرة اختراع الغواصة عابرة القارات

دى بس كانت مجرد بعض و ليست كل الامثلة لتاثير الروايات على العلم و فيه طبعا تاثير للروايات فى مجالات تانية زى السياسة يا رب بس تكون الناس اقتنعت. 

و اللى عاوز امثلة اكتر من كده عن الافكار و الاختراعات اللى طلعت من روايات يدخل الموقع ده.

3- الرواية عامل تسلية

ايه الغلط فى التسلية ؟ ايه الغلط فى الترويح عن النفس بدون اى استفادة علمية؟

يعني لو افترضنا جدلا ان النقطتين اللى فاتوا دول مش موجودين و ان الرواية ما فيهاش اى فايدة علمية غير المتعة. طب ايه الغلط فى كده؟ 

الغلط ان الواحد يفضل شغال و بيذاكر و بيشتغل و بينتج على طول طول الوقت. لازم يبقى فيه فترة راحة. لازم يكون فيه وقت للتسلية و الترويح عن النفس. و اللى بيعتبر الترويح عن النفس مضيعة للوقت يبقى بجد هو اللى بيضيع عمره بايده. ما فيش حاجة فى الدنيا اسمها واحد يفضل شغال على طول من غير اى راحة فى النص. 

4- الرواية تعطي خبرة فى الحياة 

و ده عن تجربة شخصية فيه روايات كتير جدا ممكن تستفيد منها فى حياتك الشخصية. ممكن بطل الرواية يقابل موقف و يتعامل معاه بطريقة و تكتشف ان الموقف ده قابلك شخصيا و ما عرفتش تتعامل معاه ازاى. و المقالة دى بتؤكد على النقطة اللى انا بتكلم فيها انك و انت بتقرا الرواية عقلك بيخزن المواقف اللى شخصيات الرواية بتمر بيها و انت بتتعلم من المواقف دى دون ان تدري بعد كده. 

ازاى بقى الناس تيجي بعد ده كله و تقول ان الروايات مالهاش لازمة و مضيعة للوقت؟ 

ارجو انى اكون وصلت فكرتى و ان الناس توازن فى قرايتها بين الروايات و الكتب ال Non-Fiction 

Advertisements

One thought on “القول الفصل فى أهمية الروايات

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s