طريقك الى التقديم فى المنح الدراسية خارج مصر

Standard

بسم الله الرحمن الرحيم

طبعا دلوقتى كل الناس اللى اتعينت معيدين و يمكن غيرهم بيدوروا على فرص منح دراسية لاستكمال دراستهم فى جامعة خارج مصر سواء ماجستير او دكتوراه

قبل ما اشرح كل اللى اتعلمته فى الموضوع ده هبتدى الاول اقول ليه الواحد عاوز يستكمل دراسته برة

مميزات المنح:

– الدراسة فى جامعة خارجية بتوفرلك امكانيات ممكن ما تكونش متوفرة فى جامعتك بسبب الميزانية خصوصا لو مجالك مجال عملى و محتاج ادوات و تكنولوجيا مش موجودة هنا او مش معانا فلوس نجيبها

– الدكاترة برة شغلهم الاساسي الابحاث مش التدريس و بالتالى الدكتور المشرف عليك هيساعدك كتير و هيخليك تشتغل

– البحث بتاعك هيتم الاستفادة بيه فعليا و هيتقدر مش هيترمى فى الادراج او مكتبة الكلية وخلاص

– مش هتكسل لانك بتتقيم على حسب عدد الابحاث اللى بتعملها و بتنشرها بفترة دورية و يوم ما تبطل تعمل ابحاث خلاص انت برة اما التدريس ده حاجة اختياري حاجة فرعية الباحث مش بيتقيم عليها زى ما بيتقيم على البحث العلمى بعكس الجامعات بتاعتنا قليل اوى لما تلاقي دكتور عمل بحث بعد ما اخد الدكتوراه و ده دليل واضح ان الدكاترة عندنا هدفهم من ورا الدكتوراه انه ياخد لقب و مميزات الدكتور الجامعى اما مش عشان البحث نفسه لانه لو مهتم بالبحث ما كانش وقف بعد ما اخد الدكتوراه

– مش بتشيل هم الفلوس لان المنحة معناها ان فيه جهة بتصرف عليك و بعد ما تخلص مدة المنحة المفروض بترجع بس لو الجامعة اللى انت واخد المنحة فيها عجبها شغلك ممكن تتعاقد معاك بقى انك تكمل شغل معاهم بشكل رسمي

– مش مرتبط بنظام معين …. يعني ايه ؟ فى مصر لازم الاول تاخد تمهيدي ماجستير و بعد كده الماجستير و بعد كده تمهيدي دكتوراه و بعد كده دكتوراه (ممكن الكلام ده مش فى كل الجامعات بس بتكلم عن اللى اعرفهم يعني) انما الجامعات برة اولا ما فيش حاجة اسمها تمهيدي ثانيا لو عاوز بعد ما اتخرجت اهو تاخد دكتوراه على طول عادى تقدم و تدخل على دكتوراه على طول (اعرف ناس عملوا كده فعلا و رجعوا مصر دكاترة فى سن صغير جدا)

فى الاخر احب اوضح ان دورنا فى المجتمع دلوقتى مش تدريس لا دورنا هو البحث العلمى عشان نرتقى بالعلم على المستوى العالمي (معظم الاختراعات و الاكتشافات جت من ابحاث علمية و رسايل دكتوراه و ماجستير)

الاعداد:

ازاى بقى تجهز نفسك قبل ما تقدم فى المنحة؟

1- TOEFL (Test Of English as a Foreign Language)

لما بتقدم فى جامعة اجنبية و خصوصا فى امريكا و اوروبا اول حاجة بيطلبوها منك درجة التويفل بتاعتك عشان يعرفوا التعامل معاك هيكون سهل و الا صعب فى اللغة فى جميع فروعها (كتابة، قراءة، تحدث، استماع)

الاول عشان تعرف مستواك فى اللغة لو انت شايف نفسك كويس فى الانجليزي و عاوز تتاكد هتروح اى مركز قريب منك (و المراكز الرسمية بتاعة التويفل بمواعيد الامتحان هتلاقيها فى اللينك ده TOEFL Test Centers ) و تطلب منهم تمتحن امتحان تحديد مستوى practice و ده تمنه تقريبا 50 جنيه

خلوا بالكوا ان فيه امتحان TOEFL local ممكن يكون ليه مراكز تانية انما احنا عاوزين TOEFL international و ده ليه مراكز معينة بس (يعني فى المنصورة مثلا – عشان انا من الدقهلية – المركز اللى موجود هو اكاديمية النيل فقط)

اللى يلاقي مستواه مش كويس او ضعيف و عاوز ينمي نفسه فيه materials كتير جدا جدا على مواقع كتير لتعليم الانجليزي و التجهيز للTOEFL بس انا اسف مش هحطها هنا لان الماتيريال دى المفروض بتشتريها بفلوس من الناس اللى عاملينها انما مجرد سيرش بسيط على جوجل هيجيبلك كل اللينكات اللى فيها الحاجات دى تنزلها على طول

رسوم الامتحان 160 دولار ممكن يكون فيه بعض الرسوم الاضافية للمركز يعني فى اكاديمية النيل الرسوم 1160 جنيه مصري يعني تقريبا زيادة 200 جنيه عن ال160 دولار

الامتحان مدته الكاملة 4 ساعات الا لو خلصت بدري عن كده متقسمين ساعة reading و ساعة listening و ساعة speaking و ساعة writing

الامتحان كله بيكون على الكمبيوتر (فيه منه نسخة ورقية لو حابب بس ليها مراكز مخصصة)

Reading

بيجيبلك مقالات تقراها فى مختلف المجالات و يسالك بعض الاسئلة عليها و انت تختار الاجابة الصح

Writing

بيجيبلك مقالات و ممكن مواد صوتية و بعد ما تقرا و تسمع بيسالك انك تلخص الكلام ده كتابيا او تقول رايك فى الكلام

Listening

بيجيبلك مواد صوتية (محاضرات، مناقشات، …. الخ) و يسالك اسئلة عليها و انت تختار الاجابة الصح

Speaking

بيجيبلك مقالة او مواد صوتية و انت تقول رايك او تجاوب على الاسئلة بالكلام و الكلام ده بيتسجل عشان المصححين يسمعوه و يقيموه بعد كده

بتاخد اول ساعتين و بعدين لو حبيت تاخد بريك 10 دقايق و بعد كده تكمل الساعتين التانيين

كل جزء من ال4 عليه 30 درجة يعني الامتحان كله من 120

بعد ما تخلص بتظهر نتيجتك تقريبا بعدها ب10 ايام و بيتبعتلك خمس شهادات واحدة ليك و 4 ممكن تاخدهم معاك او لو انت محدد الجامعات اللى عاوز تقدم فيها بتكتب عناوينهم و الشهادات دى تتبعتلهم على طول

اما اللى مش محدد فيفضل ياخد هو ال5 شهادات و يبعت هو براحته بعد كده

فيه جامعات زى Oxford (حتى لحظة كتابة المدونة دى) بتريح و بتطلب منك الاكونت بتاعك على موقع التويفل TOEFL   و هما بيتاكدوا من الدرجة بنفسهم

نيجي بقى لموضوع الدرجات كل جامعة و بيكون ليها متطلباتها يعني مثلا اوكسفورد اقل درجة تكون 100 من 120 فيه منح تانية بتكون طالبة 110 من 120 (و دى للعلم بالشيئ صعبة جدا مش كتير بيجيبوها وبالتالى الجهات اللى بتطلب الدرجة دى قليلة جدا جدا جدا ما عرفتش منهم غير واحدة بس) انما الغالبية بيطلب ما بين 90 و 100 من 120

2- IELTS (International English Language Testing System)

الامتحان ده معادل بالظبط للTOEFL يعني يا تاخد ده يا ده

بس ده بيعتمد على حاجتين :

1- الجهة اللى انت عاوز تقدم المنحة فيها ممكن فيه جامعات بتتطلب IELTS و فيه جامعات بتتطلب TOEFL و فيه جامعات ما عندهاش مانع فى الاتنين

2- استعدادك لنظام الامتحان التويفل زى ما قلنا كله على الكمبيوتر او ورقي و بيتصحح بعد كده اما الIELTS بتمتحن فى وجود شخص قدامك بيناقشك بالانجليزي و بتكلمه و يسالك و ترد عليه فحسب النظام اللى انت تحبه

و ده الموقع الرسمي للIELTS للى عاوز معلومات اكتر IELTS

3- GRE (Graduate Record Examination)

ده امتحان فيه جامعات بتطلبه و هما كتير و فيه جامعات مش بتتطلبه بس المؤكد انه مهم جدا و هيساعدك فى التقديم و القبول فى المنحة حتى لو الجامعة مش بتطلبه

الامتحان ده بيقيس مهارات الاستنتاج اللفظي، الاستنتاج الكمي، الكتابة التحليلية، التفكير النقدي على وجه العموم او فى التخصص بتاعك لان فيه نوعين من الامتحان فيه

GRE revised General Test

و ده بيقيس المهارات دى على وجه العموم

GRE Subject Tests

و ده بيقيس المهارات دى فى تخصصات معينة

تكلفة الامتحان ده 175 دولار

و ده برضه فيه مراكز معينة اللى بتمتحنه زى مركز AMIDEAST و المركز ده برضه بيدي امتحان الTOEFL

و اللى حابب يجرب فيه على موقع الGRE برنامج practice عشان تجرب عليه شكل الامتحان و تعرف هتمتحن ازاى و تعرف مستواك

4- Study Subject

و ده اللى هو المشروع او موضوع البحث اللى انت عاوز تدرس فيه

طبعا انت ممكن تروح المنحة و الدكتور المشرف عليك يديلك موضوع من عنده بس يفضل انك انت تبقى مجهز موضوع انت عاوز تشتغل فيه لان ده اولا بيديهم انطباع كويس جدا انك عاوز تشتغل ثانيا عشان تبقى عارف الجهة اللى انت رايحها لانك ممكن تروح جامعة ماعندهاش اهتمام فى الجزء ده بالذات في حين ان ممكن يكون فيه جامعة تانية شغالة فى الجزء ده فعلا و محتاجة باحثين فيه

ممكن تعرف من خلال البحث اسم دكتور معين مهتم بالجزء ده فى البحث و تراسله و هو يسهلك الموافقة على المنحة بتاعتك لانه محتاجك فى البحث

بعد ما تحدد النقطة اللى انت عاوز تشتغل فيها لازم تكتب Proposal بيوصف كل حاجة خاصة بالنقطة دى (المشكلة، ازاى عاوز تحلها، الجدول الزمنى، ….. الخ)

و دى مقالة من موقع جامعة Birmingham بيشرحوا فيه نقط تساعدك على كتابة البروبوزال

http://www.cs.bham.ac.uk/~hxt/phd-research-proposal.shtml

و ممكن تلاقوا من خلال Google حاجات كتير اوى تساعدكم فى كتابة البروبوزال

و كمان ممكن تبحثوا و تعرفوا ايه المواضيع اللى ممكن تشتغلوا فيها فى مجالكم لو ما فيش فى دماغكم موضوع معين شاددكم

5- بيانات مطلوبة

المفروض بقى تجهز :

– جواز السفر بتاعك

– موقفك فى التجنيد (لو انت ذكر)

– شهادة التخرج و يفضل تكون انجليزي

– بيان بالتقديرات من الكلية و يفضل يكون انجليزي

التقديم:

نيجي بقى للخطوة بتاعة التقديم

ممكن انت تكون فى دماغك جامعات معينة عاوز تقدم فيها فبتشوف الموقع بتاع الجامعة دى و تدور فيه على اللينك بتاع الGraduate Studies و تدور على جزئية الscholarships

و فى بعض المواقع مش هتلاقي جزء الscholarships الا فى مواقع الكليات يعني تدخل موقع الجامعة و بعدين تدخل منه على موقع الكلية بتاعتك و بعدين هتلاقي جوة جزء الscholarships

اهم حاجة زى ما قلتلك تعرف الجامعة دى اولا هتعرف تشتغل فيها فى موضوع البحث بتاعك اللى انت محدده و الا لا

تانى حاجة تشوف الجامعة دى متطلبة امتحانات ايه للطلبة اللى جايين من خارج البلاد زى التويفل و خلافه اللى احنا قلناهم فوق

بس اللى اهم من خطوة التقديم هى التمويل

التمويل:

فيه ناس كتير فاهمة ان المنحة الدراسية (اللى انت ما بتدفعش فيها حاجة) بتكون مقدمة من الجامعة

صح فيه جامعات بتقدم منحة بتصرف عليها هى كلها (سكنك و سفرك و اكلك و شربك و دراستك و كتبك) من عندها بس دول مش كتير

اللى بيحصل ايه ؟

الجامعة كل دورها تقبلك فى الدراسة عندها

صحيح الجامعات برة بفلوس بس مش اى حد بيقدم بيتقبل

لازم يكون فيه مواصفات معينة و يعدي اختبارات معينة اللى احنا قلنا عليها

فاهم حاجة انك تقدم الاول و تشوف هتتقبل فى انهو جامعات

بعد ما تتقبل تبدا تدور على نقطة التمويل بقى

فيه جامعات زى Oxford و DPeaul بتقدم نوعين من التمويل : تمويل كلي و تمويل جزئي

تمويل كلي بيصرفوا عليك فى كل حاجة زى ما قلنا

التمويل الجزئي بيشيلوا هما جزء من التكلفة و انت بتشيل جزء

طب تعرف منين ؟

انت بتقدم كل الحاجات اللى هما طالبينها و بعد كده بيردوا عليك يقولولك انت اتقبلت بتمويل كلي او جزئي او من غير دعم خالص يعني لو حبيت تيجي انت هتصرف كل حاجة من معاك

طب لو فرضا وصلنا للنقطة دى ان مافيش جامعة عرضت انها تقبلنى بتمويل كلي او جزئي ؟

ييجي دور بقى المنظمات

فيه منظمات كتييييييييييييييير جدا بتعرض انها تمول دراستك طول فترتها سواء سنة او اتنين او تلاتة او اربعة

طب تلاقيها ازاى ؟

فيه مواقع بتعملك بحث على كل المنظمات او الجامعات اللى بتقدم المنح و انت بقى بتسجل فيها و بتكتب كل بياناتك و تخصصك و كل حاجة و هما كل ما بيلاقوا بيبعتولك المنح المطابقة ليك على الميل بتاعك

و صدقونى بيبعتوا و بيبعتوا كتير جدا

و انا هكتب هنا موقعين من اكبر المواقع دى و اكثرهم فاعلية و لو حبيتوا اكتر دوروا على جوجل هتلاقوا مواقع كتير جدا

Scholarships.com

scholarship-positions.com/

Bill & Melinda Gates Foundation

فيه برضه منظمة القلعة فى مصر بس دى بتشترط انك بعد ما تخلص المنحة ترجع مصر تشتغل على الاقل سنتين حتى لو جاتلك فرصة تكمل برة

Citadel

كده يبقى انا قلت كل اللى عندى فى موضوع المنح و اهم حاجة تمشوا الخطوات بالترتيب يعني ما تقدموش غير لما فعلا تكونوا جهزتوا نفسكم و امتحنتوا لان فى التقديم هيطلبوا منكم نتايج الامتحانات و ساعات هيطلب منكم البروبوزال كمان فلازم يكون جاهز

فيه ملحوظة كمان و انتو بتدوروا على الscholarships ان انتو تدوروا فى قسم الgraduate scholarships لانهم برة عندهم undergraduate scholarships لطلبة الثانوى اللى عاوزين يروحوا الكلية بس مش قدارين يدفعوا فلوسها

يا رب اكون قدرت افيدكم و ان شاء الله كل باحث يبدع فى المجال بتاعه

المصادر:

Bill Gates Foundation

ETS

GRE

AMIDEAST

GRE on Wikipedia

Birmingham University

Oxford University

DePaul University

Scholarships

Scholarships Positions

TOEFL

Advertisements

33 thoughts on “طريقك الى التقديم فى المنح الدراسية خارج مصر

    • عشان الدراسة فى جامعة برة اعتقد انك تقصدي
      undergraduate scholarships
      اعتقد انها بتتطلب نفس الحاجات بس هتفرق فى السيرش بقى
      بدل ما تدورى فى ال graduate scholarships هتشوفي زى ما قلتلك ال undergraduate

  1. hanan abbass

    بجد كلام رائع برافو جدا انت انسان منظم و زكى و كويس ان فى حد فى تفكيرك

  2. walaa

    كلامك منطقى جدااااااااا ومنظم وبجد أستفدت منه كتير …
    أنا الان بدرس اللغة الانجليزية لأنى بجد محتاجة أكمل دراستى بره . على فكرة أنا حاصلة على ليسانس الحقوق ولكن لم أعمل بمهنة المحاماه مطلقاً وكنت بفكر الاول أنى أكمل دراسة وبعدين أشتغل . وأنت بتقول أنى على الاقل أكون مقدمة بحث من عندى وأنا مش بعمل فى المحاماة أصلا وتقريبا نسيت اللى درسته بس قولت أكمل دراسة وتكون مع شغل على أساس تدريب ودراسة فى نفس الوقت . هل ينفع ؟

    • هو الفكرة من المنحة انك هتروحى تشتغلي فى بحث فبيبقوا طالبين proposal للبحث اللى انوية تشتغلي فيه عشان يعرفوا هل يستحق المنحة و الا لا

  3. Ahmed09

    طيب لو حضرتك تعرف جامعات بتقبل مجال اقسام زي مجال biochemistry للماستر و دكتوره او اني اخد دكتوراه على طوول زي ما حضرتك زكرت ممكن بس تجيبلي اسماء او لينك

    و شكرا بجد على موضوع حضرتك و انا مش كنت ابدا اتوقع ان في حد ينظم بالطريقة دي

    • فيه فعلا منح كتيييييييييييييييييير جدا بتتبعتلى من موقع Scholarship Positions فى الBiochemistry
      سجل عليه و هيجيلك اعلانات كتير اوى

  4. Ibrahim raslan

    انا معجب جدا بطريقتك الأنيقه فى عرض الموضوع لانى تصفحت مواقع كتيرة ولكن كان ما قرأته هنا هو الاكثر افاده لى لكن اسمح لى بسؤال :انا عاوز ادرس الماجستير فى التخطيط و الاداره التعليميه ازاى اعرف الجامعه المتاح فيها مثل هذه الدراسه؟

  5. طب انا خريجه حقوق وتقديري مقبول بس عندي طموح ادرس مجالي بره واعمل دراسات فيه هينفع مع تقديري ولا صعب

    • بصراحة انا مش عاوز افتي في مجال مش عارفه بس انا مؤمن ان اللي هيدور و مش هيزهق اكيد هييلاقي حاجة
      ما تيأسيش بسرعة و دوري و قدمي في كل حاجة

  6. Fatemah Abd_Elhameed

    انا بعمل ماستر في مصر فيزياء اشعاعيه .. هل ينفع اما اخلص اعمل الدكتوراه بره في مجال تاني زي النانو تكنولوجي .. ولا لازم اكمل فيزياء اشعاعيه

    • لا عادي بس ساعتها بقي هتعتبري junior في المجال
      لان ماعندكيش خبرة فيه
      طبعا لما بتكوني اشتغلتي فيه قبل كده ده بيديكي ميزة بس في نفس الوقت ما فيش مانع عادي

  7. مجهود رائع كما تعودنا منك دائما .. عندما قرات المقال شدني جدا اعرف اسم المدونه واسم صاحبها .. وسعدت جدا عندما اكتشفت
    🙂 انه” الاول على الدفعه” كما كنا نسميه
    لانه كان دائما غير بخيل بالمعلومه
    ومعطاء بالرغم اننا لا نعرفه شخصيا
    الى الامام دائما

      • rana

        انا عايزة اسافر دولة اجنبية اشتغل وبعدين ادرس ممكن انا مخلصى ماستر من سبع اشهر لو تعرف دولة لو عربية اقدر احضر فيها الدكتوراه ومعترف بها في مصر ياريت تفولي

  8. christina

    لو انا خريجة تجارة وكنت عايزة ادرس computer scinceبرة لان بحب المجال ده جدا …. فهل ممكن اتقبل فى منحة مثلا ولا لازم اكون خريجة حاسبات ومعلومات

    • christina

      انا خريجة تجارة وكنت عايزة ادرسى علوم الحاسب لانى بحب المجال ده …. هل هينفع انى اتقبل فى منحة ولا لازم اكون خريجة حاسبات ومعلومات

      • بصراحة انا ما عنديش معلومات فى الحتة دى ممكن تسالى فيها بقى اى حد متخصص فى الاداريات دى بقى فى اى كلية حاسبات

  9. kholoudemam

    عاوزه اعرف خطوات ازاى ااقدم اكمل درااسه بره بعد ثانوى ياريت بجد تفيدنى انا ف هندسه بس عايزه اكمل دراستى بالخارج انا متلخبطه خالص ومش عارفه ابدا اى حاجه بجد جزاك الله خير لو قدرت تساعدنى

  10. يقدم موقع ران أفضل الخدمات المقدمة للدراسة في اوكرانيا، فإذا كنت تبحث عن فرصة الدراسة في اوكرانيا، فموقع ران هو الموقع الأفضل لك والذي سيوفر لك جميع المعلومات والمساعدة الأفضل لتتمكن من اغتنام فرصة الدراسة في اوكرانيا، فأوكرانيا من الدول التي توفر أفضل الفرص للدراسة وتوفر تدريب أفضل للطلاب ليكونوا على مستوى عالي من الكفاءة، فإذا كنت تريد التخصص في الطب، فسيتم توفير لك مستشفى لتتدرب فيها من السنة الثانية، وبذلك يتم توفير وقت كبير للتدريب لتكون على قدر عالي من الكفاءة، فمع موقع ران يمكنك الحصول على فرصة الدراسة في اوكرانيا وانجاز المهام الإدارية للتسجيل في الجامعات الاوكرانية.

    يقسم موقع ران إلى أقسام عديدة ليتمكن المتصفح من الحصول على جميع المعلومات المتعلقة بالدراسة في اوكرانيا وليتمكن أيضا من الحصول على المساعدة الكافية ليتمكن من اتمام الخطوات اللازمة، فيوجد قسم عروض حصرية والذي يضم الخدمات المختلفة التي يقدمها الموقع كخدمات التصديقات وتوفير الأماكن في السكنات الجامعية وغيرها، قسم عنا وقسم مندوبنا والذي يحتوي على مكتب الموقع الرئيسي والمكاتب الأخرى المتواجدة في الدول العربية المختلفة، كما يوجد قسم عن اوكرانيا ليتمكن الذي يريد الدراسة في اوكرانيا من معرفة البلد بشكل أكبر، كما يوجد قسم صور وفيديو وقسم معلومات عامة والذي يحتوى على معلومات عن الطلاب والتسجيل والإقامة وعن أسعار كل ما يتعلق بالدراسة في اوكرانيا، ويوجد أقسام أخرى، يمكنك الدخول على الموقع لتتمكن من معرفة المزيد من المعلومات، تفضلوا بزيارة الموقع على الرابط التالي:

    http://ranukraine.com/
    __________________

  11. Mohamed Elmasry

    انا فى اخر سنه فى هندسه و هاسر بره مصر ممكن اكمل و انا بره ولا مش هاينفع

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s